ບັນຫາເຈົ້າໜ້າທີ່ດ່ານບໍ່ຈໍ້າກາເຂົ້າປະເທດຍັງແກ້ໄຂບໍ່ຕົກ

ບັນຫາເຈົ້າໜ້າທີ່ດ່ານບໍ່ຈໍ້າກາເຂົ້າປະເທດຍັງແກ້ໄຂບໍ່ຕົກ ນັບຕັ້ງແຕ່ມີການເປີດປະເທດເປັນຕົ້ນມາ ພັກ-ລັດຖະບານ​ໄດ້ມີນະໂຍບາຍອຳນວຍຄວາມສະດວກສະບາຍໃຫ້ນັກທ່ອງທ່ຽວຕ່າງປະເທດໄດ້ເຂົ້າມາທ່ຽວຊົມ​ ພ້ອມທັງເນັ້ນໃຫ້ເຈົ້າໜ້າທີ່ທຸກພາກສ່ວນເອົາໃຈໃສ່ເບິ່ງແຍງແຂກຕ່າງດ້າວທ້າວຕ່າງແດນ ດ້ວຍຄວາມເປັນມິດ,​ ບໍ່​ສວຍໂອກາດ​ ແລະ ຮັກສາມາດຕະຖານການທ່ອງທ່ຽວໃຫ້ກາຍເປັນທີ່ຍົກຍ້ອງຂອງຊາວໂລກ. ແຕ່ເຖິງແມ່ນວ່າລັດຖະບານເນັ້ນແລ້ວເນັ້ນອີກກໍຕາມ ຍັງມີຫຼາຍປາກົດການ​ຫຍໍ້​ທໍ້,​ ສ້າງຄວາມເອື່ອມລະອາແກ່ນັກທ່ອງທ່ຽວທີ່ເຂົ້າມາຈຳນວນຫຼາຍບັນຫາເຊັ່ນ: ບັນຫາການບໍລິການທີ່ພັກ,​ ບັນຫາຂຶ້ນລາຄາສິນຄ້າແບບກະໂດດ,​ ການບໍລິການຂອງເຈົ້າໜ້າທີ່ດ່ານ,​ ການຈະລາຈອນ ແລະ​ ບັນຫາລົດໄຟ ເຊິ່ງບາງບັນຫາໄດ້ຮັບການແກ້ໄຂແດ່ແລ້ວ ແຕ່ກໍຍັງປາກົດວ່າບາງບັນຫາໄດ້ຜຸດຂຶ້ນມາຕື່ມ ໂດຍສະເພາະບັນຫາເຈົ້າໜ້າທີ່ດ່ານລືມຈໍ້າກາເຂົ້າປະເທດໃຫ້ນັກທ່ອງທ່ຽວ​ ແລ້ວບາດເຂົາອອກປະເທດກໍປັບໃໝເອົາເງິນເຂົາ. ຄວາມຈິງແລ້ວບັນຫາການລືມຈໍ້າກາເຂົ້າປະເທດ ເປັນຄວາມບົກພ່ອງຂອງເຈົ້າໜ້າທີ່ດ່ານ ຄວນປັບໃໝເຈົ້າໜ້າທີ່ດ່ານ ບໍ່ແມ່ນປັບໃໝນັກທ່ອງທ່ຽວ ຖ້າຫາກມີຫຼັກຖານວ່າໄດ້ເຂົ້າປະເທດຢ່າງຖືກຕ້ອງເຊັ່ນ​ ມີການຈໍ້າກາອອກປະເທດຕົ້ນທາງ, ມີວັນທີເວລາຄັກແນ່ ສາມາດກວດສອບໄດ້ ກໍຈໍ້າເຂົ້າ ແລະ​ຈໍ້າອອກໃຫ້ເພິ່ນກໍຖືວ່າຈົບ​ ແຕ່ບໍ່ແມ່ນການປັບໃໝ.​ ການ​ແກ້ໄຂບັນຫານີ້ງ່າຍ​ ເພາະສາມາດກວດສອບໄດ້ ແຕ່ເປັນຫຍັງຈຶ່ງໃຫ້ເກີດມີບັນຫານີ້ຂຶ້ນ​ ມັນເປັນຄວາມຜິດພາດແບບບໍ່ຄວນໃຫ້ອະໄພ, ເປັນຄວາມຜິດທີ່ບໍ່ສົມຄວນເປັນພະນັກງານ ຕ້ອງລົງວິໄນແບບເດັດຂາດ ເພາະການກະທຳດັ່ງກ່າວຖືວ່າເປັນການບົກພ່ອງທາງໜ້າທີ່,​ ມີແນວຄິດສວຍໂອກາດ ແລະ​ ເອົາປຽບຜູ້ໃຊ້ບໍລິການ. ຝາກໃຫ້ພາກສ່ວນກ່ຽວຂ້ອງເຂັ້ມງວດ​ ແລະ​ ກວດກາ​ຄັກແນ່​ ຢ່າໃຫ້ບັນຫານີ້ເກີດຂຶ້ນອີກ​ ປາໂຕດຽວເນົ່າໝົດຂ້ອງແທ້ໆ. ຂ່າວຈາກ: laonew-net